CEBU, Philippines - Napusilan patay ang usa ka ulitawo kinsa gidudahang maoy mikawat sa manok igtatari sa iyang silingan didto sa Sitio Panaghiusa, barangay Tunghaan sa lungsod sa Minglanilla niadtong Martes sa alas 10:20 sa gabii.
Ang biktima mao si Alvin Alcanzado, 28, ulitawo, apan may kapuyo ug trabahante sa konstruksyon sa maong lugar samtang ang suspek mao ang iyang silingan nga si Harley Canares, hingkod.
Si PO2 Nikki Carlo Plarisan sa Minglanilla Police Station mibutyag sa Banat News nga gisung sa suspetsado ang biktima sa balay niini.
Ang kapuyo sa biktima kinsa wala kakuhai og ngalan sa kapolisan mitug-an nga isog kuno kaayong nanuktok sa ilang pultahan ang suspek ug paggawas sa biktima gipangutana niini nganong gipangawat ang iyang manok igtatari ug dayon gipusil kini.
Naigo sa dughan ang biktima nga maoy namatyan niini samtang ang suspek dali kaayong nakaikyas ug padayon pang gipangita sa kapolisan. (BANAT NEWS)