Nasakmitan og shabu ug armas priso

CEBU, Philippines - Nasakmit ang armas ug mga pakete sa gituohang shabu gikan sa suspetsadong illegal drug pusher  ug  sa  kustomer  niini nga nadakpan sa  buy bust operation sa kapolisan  didto  sa sitio Mangga sa barangay Jugan sa lungsod sa Consolacion  sa miaging gabii.

Si PO2 Johnaskie  Romero sa kapolisan sa maong lungsod miila sa duha nga nadakpan nga mao sila si Edgar Legaspina, 27, minyo, ug Ebenser Sapio, 34 anyos, minyo nga pulos nagpuyo sa maong dapit.

Matud pa ni PO2 Romero nga ang team sa kapolisan sa maong lungsod nga naglangkob nila ni PO3 Edmund Melendres, PO1 Julius Patac, PO3 Robert Saromines ug PO1 Ronilio Heredia  mipahigayon og buy bust sa maong suspetsado human sa pipila ka adlaw nilang pagpaniid sa illegal nga kalihokan  niini.

Dugang pa niya nga usa sa ilang mga kauban nga polis   maoy  nagpatuo nga kustomer ug  maoy nakigsabot kang Legaspina   sa  pagpalit  niya  og  upat ka pakete nga shabu sa kantidad nga P500.

Sa pagtunol  sa suspetsado  sa  shabu   ngadto  sa ilang police decoy  ila  dayon  kining  gisignit ug sa ilang pagrikisa sa lawas ni Legaspina  nahinulan nila  ang kalibre .380 nga armas  niini nga  nagtangag  og  lima  ka  bala  sa iyang  magazine.

Matud pa ni PO2 Romero nga si Sapio  nga didto  usab  sa maong  lugar  kinsa  gisuspetsahan  nila  nga  customer sa  suspetsado  gilakip  nila  sa pagdakop ug gibalhog  sa bilanggoan.

Ang kasong kalapasan sa Section 5, Section 11 sa Article II ubos sa Republic Act 9165 kon Comprehensive Dangerous Drug Act of 2002  ilang giandam nga ipasaka batok  sa  mga  dinakpan.

Ang dugang kaso nga ilang ipasaka kang Legaspina mao ang kalapasan sa Comelec Gun Ban ug kalapasan sa Republic Act 8294 kon illegal nga paghupot og armas nga walay lisensiya. (BANAT NEWS)