CEBU, Philippines - Ang paghatag og libreng edukasyon sa mga batan-on ilabi na sa motungha sa kolehiyo nga taga lungsod ilabi na ang nagpuyo sa bukid sa probinsiya sa Sugbo maoy tubag sa damgo sa kabus nga mga ginikanan nga makalampos og kurso sa kolehiyo ang ilang anak.
Si magpapatigayon Glen Soco nakakita ning maong panginahanglan atol sa iyang adlaw- adlaw nga pagsuroy suroy sa mga kalungsoran ug dakbayan sa tibuok Sugbo dungan sa pagpakighimamat sa mga molupyo sa matag lugar sa iyang pagpaminaw sa mga batakang panginahanglan sa katawhan nga nagkinahanglan og serbisyo sa goberno.
Si Soco nga kandidato pagka-bise gobernador mao usab ang tag-iya ug tagdumala sa Global Power Skills Development Center nga nagtanyag og mga kurso nga accredited sa TESDA.
Gipadayag ni Soco ang panginahanglan sa pagtukod og mga Provincial College sa kalungsoran sa Sugbo aron ang taga bukid makapahimus sa libreng edukasyon nga angay itanyag sa kagamhanan alang kanila. Nasuta kini ni Soco pinaagi sa pagkuha niya og pulso sa katilingban bahin sa umaabot nga piniliay.
Usa sa mga suliran sa mga ginikanan sa kahilitang mga lugar mao ang kalisud sa paglampos og kurso sa ilang mga anak tungod sa kalayo sa eskuylahan ug ang kaapiki usab nila sa ibayad sa matrikula sa eskuylahan.
Gipasabot ni Soco nga angay kining hatagan og prayoridad sa kagamhanan sa lalawigan tungod kay katungod kini sa mga Sugbuanon nga maatiman sa goberno ang ilang problema.
Ang pagtanyag og libreng edukasyon sa mga atua magpuyo sa mga kahilitang lugar sama sa kabarangayan sa kabukiran maoy gikinahanglan kaayo, sumala ni Soco.
Ang batan-ong Soco mipasalig nga mohimo siya og dalaygong lakang alang sa katumanan niini ilabina kun kahatagan siya og higayon nga makalingkod sa Kapitolyo human sa eleksyon sa Mayo.
Laing katuyoan ni Soco mao na unya ang pagtukod og TESDA sa kalungsoran aron mas daghan ang makabenepisyo sa mga pagbansay niini ug makatabang sa suliran sa employment sa mga kabus sa kalungsoran. (BANAT NEWS)