CEBU, Philippines - Kritikal ang kahimtang sa usa ka tawo nga gidunggab sa wala hiilhing kriminal didto sa sitio Soong II, barangay Mactan, dakbayan sa Lapulapu sa miaging kaadlawon. Ang biktima mao si Ryan Icoy, 28, minyo, nga nagpuyo sa maong dapit samtang ang suspetsado usa ka mamaligyaay og prutas. Si PO2 Winston Ybanez sa kapolisan sa homicide section sa maong dakbayan nga nahinabi sa Banat News miingon nga kuyog sa biktima ang iyang mga higala nga nag-inom sa usa ka tindahan sa maong dapit.
Dugang pa niya nga samtang alegre kaayo ang grupo, miagi ang maong vendor nga nanangpit sa katawhan bahin sa iyang baligyang prutas nga gisulod sa bukag ug gilukdo niini.
Unya giduol kini sa biktima ug gitutokan ang vendor hinungdan nga mihiwasa sa kalagot ang naulahi nga misangpot sa ilang panaglalis.
Ang vendor kansang ulo naglabad tingale kay way halin milanit sa iyang kutsilyo ug walay kukaluoy nga gihansak tulo ka higayon sa dughan ang biktima. Dihang nalup-og ang biktima sa yuta dali usab kaayong mipahilayo sa maong dapit ang kriminal. Gihatud dayon sa iyang mga higala ang biktima ngadto sa Vicente Sotto Memorial Medical Center sa dakbayan sa Sugbo ubos sa talandugong kahimtang samtang padayon pang gipangita sa kapolisan ang kriminal. (BANAT NEWS)