CEBU, Philippines - Si Kongresista Tomas Osmeña dili mosugot nga ilang mga sakop sa Bando Osmeña Pundok-Kauswagan (BOPK) nga ituboy sa Kugi Uswag Sugbo mo-apil sa mga pulong-pulong sa ilang kontra.
Giluwatan kining pasidaan ni Osmeña tungod kay si Raymond Garcia daan na nga mipahibalo nga mora’g iapil sa ilang grupo pag-endosar ang kandidato ni Cogon-Pardo Barangay Captain Eugenio Gabuya Jr. Si Gabuya karaang sakop sa KUSUG apan karon anaa na siya mosandig sa BOPK sa iyang paglansar pagkakonsehal sa south district alang sa eleksyon karong Mayo 13. Matud ni Osmeña nga dili siya mosugot nga si Gabuya moapil sa kampanya sa ilang kaatbang nga partido kun mahitabo nga iapil siya pag-endosar isip “common candidate†sa duha ka politikanhong kahugpongan.
Si Osmeña nagkanayon nga makadaut kang Gabuya kun iya kining himoon kay ang mga dumadapig sa BOPK dili na man unya ganahan kaniya.
Sa buwag nga pakighinabi sa Banat News kang Gabuya, ang kapitan sa Cogon-Pardo miingon nga bisan pa’g moendosar ang KUSUG kaniya dili niya kini ubanan sa ilang mga rally. Si Gabuya makaduha na nga mitinguha nga magkonsehal pagbalik sa dakbayan apan napilde siya sa sunod-sunod nga eleksyon kaniadtong 2007 ug 2010. (BANAT NEWS)