CEBU, Philippines - Kapin sa 30 ka panimalay ang gilamoy sa dakong sunog kagahapon sa kaadlawon diha sa sitio Maharlika ug Palsy sa barangay Sambag 2 dakbayan sa Sugbo.
Pasado alas-2 sa kaadlawon nadawat sa kabomberohan ang alarma sa maong sunog ug giisa gilayon kini ngadto sa task force alpha human daling mikatap ang kalayo sa mga panimalay.
Sa nakuhang taho sa kabomberohan nga nagsugod ang maong kalayo diha sa panimalay sa usa ka Nelia Gelbolingo. Nagsugod ang kalayo diha sa kisami sa panimalay ni Gelbolingo nga maoy na-ingnan sa kasunog sa laing kabalayan sa maong dapit.
Gibana-banang mokabat ngadto na sa 1.5 milyones pesos ang danyos sa maong sunog nga nakontrolar sulod sa kapin usa ka oras.
Sa report sa sibyaanang dyLA , adunay usa ka 90-anyos nga babaye nga si Basilisa Miral ang gikatahong nakaangkon og paso sa iyang lawas dihang wala kini dayun makagawas gikan sa nasunog nga panimalay.
Giingong wala na kini panimuot dihang nabangalan sa kabomberohan human ma-suffocate sa kabaga sa aso.
Sa pakighinabi sa Banat News ni Fire Marshall William Tacaldo naglisod sila sa pag-atraka sa lugar tungod sa kahuot sa dalan.
“Huot kaayo ang lugar, atong trucks gani naglisod gani pag-backing. Samutan pa nga nay nag-parking sa daplin sa karsada,†pasabot pa ni Tacaldo.
Faulty electrical wirings maoy pasiuna nilang gidudahang hinungdan sa maong sunog. Ang mga nasunogan kasamtangang gipahimutang sa Sambag 2 gymnasium samtang mipadala na og hinabang ang siyudad ug ang barangay sa mga nabiktima. (/EIM)(BANAT NEWS)