CEBU, Philippines - Kritikal ang kahimtang sa usa ka trabahante sa konstruksyon human pusila sa iyang uyoan samtang natulog sa iyang payag didto sa barangay Balungag, lungsod sa San Fernando, sa miaging kaadlawon.
Ang biktima mao si Jonathan Gantuangco, 24, construction worker, ulitawo, nga nagpuyo sa maong lugar.
Samtang ang suspek mao ang iyang uyoan nga si Nelson Gantuangco Sr., 50, minyo, kinsa silingan ra usab sa biktima.
Si PO3 Marjurkin Misuari sa San Fernando Police Station mibutyag sa Banat News nga ang mipahibawo kanila bahin sa maong hitabo mao si Fremelyn Guntuangco Cabuncal, hingkod, ug maguwang sa biktima.
Nasayran gikan sa maong saksi nga human mabati niya ang buto-buto sa armas iyang nakit-an ang suspek uban si Joel Locsin, 40, minyo, silingan nila, kinsa nagdali nga miikyas nga nagbitbit pa sa iyang armas. Midugang si PO3 Misuari nga taud-taod nabati niya nga nagping-it na sa kasakit ang biktima kinsa nasabak sa tulo ka bala sa ulo busa gihatud dayon nila ngadto sa Carcar City District Hospital apan gibalhin usab dayon sa tambalanan sa dakbayan sa Sugbo.
Personal nga dumot ang gitutokang motibo sa nagpadayong imbistigasyon sanglit gibutyag sa saksi nga pipila ka adlaw sa wala pa ang hitabo nakadawat na og death threat ang biktima.
Ang kapolisan padayon pa sa ilang manhunt operation batok sa suspek. (WC) (BANAT NEWS)