CEBU, Philippines - Gibutyag ni Cebu City South District Congressman Tomas Osmeña nga ang pagsupak sa mga negosyante sa pagbutang og flyover projects diha sa Caretta ug sa Gorordo Avenue makatabang unya sa pagpalambo sa South Road Properties.
Matud ni Osmeña nga moabot ang higayon nga mograbe gyud pag-ayo ang problema sa trapiko diha sa nahisgutang mga dapit ug makaalkanse kini sa mga magpapatigayon kay wala nay ganahan nga moanha sa ilang patigayon.
Nalantawan ni Osmeña nga kun muabot na kining maong sitwasyon ang mga dagkung magpapatigayon adto na mobutang sa ilang puhonan sa SRP.
Naobserbahan ni Osmeña nga ang mga dapit nga grabe kaayo ang problema sa trapiko sama sa dalan Colon, yam-iran na sa mga tawo. Gusto unta ni Kongresista Rachel “Cutie†del Mar nga patukoran og flyover ang eskina sa barangay Caretta ingon man sa Gorordo ug Archbishop Reyes Avenue, apan dunay pipila ka tawo nga misupak niini.
Si Osmeña miingon nga ang SRP maoy labing haum nga butangan og patigayon kay gikan sa airport mahimong dali ra kaayo kini abuton ilabi na kun mapalapdan ang McArthur Boulevard ug mabutangan og flyover o kaha tunnel sa dagko nga eskina aron dili na kinahanglang mohunong pa ang mga sakyanan. (EIM) (BANAT NEWS)