Polis nga shabu dealer sikop

CEBU, Philippines - Nasikop ang   usa  ka kontrobersyal   nga  polis  nga sakop kanhi  sa  Cebu City Police Office (CCPO), atol sa buy bust operation   nga  gilusad sa Regional Anti-Illegal Operations Group (RAIDSOTG)   didto  sa likod  nga bahin  sa Ramos Public Market, sa barangay Sta. Cruz, dakbayan sa  Sugbo  sa miaging  gabii.

Ang  nasikop   mao  si Junicar Esteñoso, kanhi sakop sa Mobile Patrol Group (MPG) sa CCPO  uban  kaniyang  gisikop  mao ang  iyang  kauban   nga si Norgia  Daligdig, 29, nga taga  dakbayan  sa Lapu-lapu.

Si Sr. Insp. Henrix Bancoleta, team leader sa RAIDSOTG nagkanayon nga ilang gipalitan si Esteñoso og usa ka bulto  nga gidudahang shabu nga nagkantidad og P25 mil.

Matud pa ni Bancoleta nga si Esteñoso maoy midawat sa kwarta samtang si Daligdig usab ang mitunol sa shabu ngadto sa polis nga poseur buyer.

Human  madawat  sa kapolisan  ang  giingong  shabu,  giposasan  usab  dayon  nila  si Esteñoso  ug  Daligdig

Samtang laing duha ka bulto sa gidudahang shabu ang nakuha sa kapolisan gikan sa posisyon sa duha ka dinakpan   nga nagkantidad og P75 mil.

Dugang pa ni Bancoleta nga sa wala pa sila  mag-buy bust, duha ka semana nilang gipanid-an ang illegal nga kalihokan nila ni Esteñoso ug Daligdig kinsa gihulagway nga high -profile target nila ang duha tungod  sa  pagka-notado na kining drug pusher.

Midugang  si Bancoleta nga ang duha ka dinakpan makahalin na  og tag-  200 gramos matag semana ang matag  usa  kanila ug dili momenus  P1milyon   ang kantidad. Nasayran usab nga si  Esteñoso  maoy  tig-supply  og shabu  sa  mga notado  kaayong  drug  den  sa dakbayan  sa Sugbo  samtang  si Daligdig  mao  usab  ang  tig-supply ning  maong  ilegal  nga  produkto  didto sa dakbayan sa Mandaue ug Lapu-lapu.

Matud pa ni Bancoleta nga bag-ohay pa lang nga naabot si Daligdig gikan sa Mindanao ug ilang  gisuta  karon kun ang maong  mga shabu gikan  ba didto.

Nasayran  usab ni Bancoleta,  nga sa polis pa si Esteñoso nalambigit na ang ngalan niini sa illegal nga drugas.

Gawas niini, gikatahong aduna kini daghang kaso nga gi-atubang ug gani, nag Absent Without Leave (AWOL) kini sa iyang pagkapolis.

Apan matud pa ni Bancoleta nga ang tanang taho nga ilang nakuha ila pang   gisuta   karon.

Gisusi  usab sa RAIDSOTG kun  kinsa ang supplier sa duruha ug kun   diin  kini  maggikan.  (BANAT NEWS)