CEBU, Philippines - Gibutyag ni Cebu City South District Congressman Tomas Osmeña nga ang presidente sa Kugi Uswag Sugbo (Kusug) nga si Atty. Raymond Garcia nagtinguha diay unta nga molansar pagka -konsehal sa dakbayan ubos sa Bando Osmeña Pundok-Kauswagan (BOPK).
Matud ni Osmeña nga wala niya ilakip si Raymond tungod sa rason nga ang pamilya’ng Garcia padayon nga miempleyo ni Jonah John Rodriguez nga nagsilbi kaniadto nga secretary sa inahan ni Raymond nga asawa ni kanhi mayor Alvin Garcia.
Wala makalimti ni Tommy nga si Jonah John mao ang tawo nga gikonbikto sa hukmanan ug gisilotan pagkapriso og unom ka tuig tungod sa pagpadala og mga law-ay nga text message sa cell phone ni Konsehal Margarita “Margot†Osmeña.
Matud ni Tommy nga si Raymond nakigtagbo gani kang Nanette Garong nga maoy nagdumala sa BOPK radio program sa DYLA ug ilang gihisgutan kaniadtong Septiyembre ang posible nga pag-apil sa batan-ong Garcia sa han-ay sa BOPK.
Si Raymond hinuon nanghimakak nga siya maoy naninguha nga malakip sa BOPK line-up pagka konsehal apan iyang giangkon nga dunay iyang mga dumadapig nga maoy mihimo niini.
Giangkon ni Garong nga si Jonah John nga kauban niya kaniadto nga sakop sa Sanguniang Kabataan (SK) maoy naghimo’g paagi aron magkatagbo silang tulo si Raymond didto sa karaang balay sa mga Garcia sa Juana Osmeña Street.
Matud ni Raymond nga ang ubang sakop sa pamilyang Garcia supak usab nga modagan siya pagka konsehal ubos sa landong sa BOPK.
Si Osmeña mitug-an sa maong kasayuran pipila ka adlaw human ang KUSUG ubos sa pagdumala ni Raymond mituboy sa mga kandidato nga sakop sa Team Rama. (BANAT NEWS)