CEBU, Philippines - Negatibo sa dangerous drugs ang resulta sa gipahigayong laboratory test kagahapon sa mga ecstacy capsule nga nasakmit sa kapolisan gikan sa usa ka fashion designer ug sa iyang laing tulo ka kauban.
Matud pa ni Sr. Insp. Henrix Bancoleta sa Regional Anti-Illegal Drugs Task Group (RAIDSOTG) sa pakighibabi sa Banat News nga gibuhian dayon nila si Ivan Belocura, Glenn Libradilla, Ryan Dumago ug Junjie Ignacio.
Dugang pa ni Bancoleta nga dihang ilang nadawat ang resulta sa laborartory test sa ilang nasakmit nga pinulbos nga kapsula, wala silay igong katarungan nga itanggong pa ang mga dinakpang suspetsado.
Matud pa niya nga ang maong mga kapsula wala mahilakip sa mga kemikal nga giklasipikar nga dangerous drugs. Apan giklaro ni Bancoleta nga sa ilang nadawat nga report nga si Ivan Belocura nalambigit sa pagpamaligya og ecstacy hinungdan nga ila kining gipaubos sa surveillance ug tungod kay positibo, mipahigayon dayon sila og buy bust. (BANAT NEWS)