CEBU, Philippines - Mga nag-atbang nga mga kandidato, mga magtutudlo, Local Government Unit (LGU), Bureau of Fire (BFP), Comelec, Simbahan lakip na ang kapolisan sa lungsod sa San Fernando gipaubos og tunga sa adlaw nga seminar workshop kagahapon alang sa malinawong piniliay sa bulan sa Mayo.
Si Inspector Gerard Ace Pelare, hepe sa San Fernando Police Station nga nahinabi sa mga tigbalita kagahapon nagkanayon kini nga ang San Fernando naapil kini sa election watchlist area (EWA).
Giangkon ni Pelare nga nagkinahanglan sila sa kooperasyon sa tanang stakeholders sa lungsod sanglit sila maoy nasuhito sa ilang mga lugar ug aron masayran nilang daan kung unsay ilang aksyon matag problemang motumaw
Ang San Fernando adunay 21 ka mga barangay, wala pa hinuoy natalang kagubot alang sa nagsingabot nga eleksyon apan niadtong nakalabay’ng 2010 elections adunay komosyon nga nahitabo tali sa nagkaatbang nga mga mayor. Mitambong ang mga sakop sa Alayon Party nga sila si Konsehal Benedicto Panuncial ug sakop sa Liberal Party nga si Bise Mayor Miko Canoy.
Si Senior Superintendent Patrocinio Comendador kinsa maoy pinasidunggang dinapit sa nahisgutang seminar nalipay sa maong seminar. Matud ni Comendador nga base sa ilang assessment ang San Fernando usa sa potential nga EWA apan wala pa kini pormal nga deklarasyon gikan sa Comelec ug kapolisan. (/EIM) (BANAT NEWS)