CEBU, Philippines - Nasikop sa kapolisan ang usa ka fashion designer kinsa suspetsado nga dealer sa ecstacy capsule uban sa laing tulo ka kauban niini didto sa barangay Lahug, ning dakbayan sa Sugbo kagahapon sa kaadlawon.
Ang mga nasikop mao sila si Ivan Belocura, fashion designer , Glenn Libradilla, Ryan Dumago, ug Junjie Ignacio.
Atol sa ronda nga gipahigayon sa Regional Anti-Illegal Drugs Special Task Group (RAIDSOTG) mipalit una sila og usa ka kapsula nga ecstacy kang Belocura ug dungan sa pagtunol niini sa maong butang giposasan dayon kini sa kapolisan. Lakip nga nasikop mao ang tulo ka higala niini kinsa nasakpan usab nga naghupot sa gituohang ecstacy.
Sa nakuhang impormasyon sa kapolisan nasuta nga taud-taud nang namaligya og ecstacy si Belocura ngadto sa iyang kahigalaan.
Nasayran usab niini nga si Belocura makahurot pagbaligya og 15 ngadto sa 20 ka kapsula kada adlaw sa kantidad nga tag P1,500 matag usa .
Matud pa ni Sr. Insp. Henrix Bancoleta ang team leader sa maong operasyon, nga sa ilang nasayran, adunay hagbonganang lugar si Belocura sa iyang mga baligyang ecstacy capsule nga kasagaran niini mga beer house.
Dugang impormasyon nga nakuha ni Bancoleta nga gawas niini, mas kusog ang halin sa ecstacy kun si Belocura mopahigayon og mga kalihokan nga tapokan sa iyang mga kahigalaan ug maoy mamalit sa iyang baligyang ecstacy.
Samtang si Belocura sa iyang bahin mipadayag nga dili gyud siya mamaligyaay og ecstacy. Igo lang kuno siya nga mopalit kun ugaling ang iyang mga higala nagkinahanglan nga mogamit niini.
Gitug-an usab ni Belocura nga mogamit siya niini, apan tungod lang sa ilang paglingaw-lingaw ug dili gyud siya mamaligya og ecstacy.
Dugang impormasyon gibutyag ni Belocura mao nga aduna silay palitanan sa dakbayan sa Mandaue apan wala na kini motug-an sa hustong lugar. Nasakmit sa kapolisan gikan sa mga dinakpan ang duha ka plastic nga adunay sud nga powderized nga ecstacy, duha ka kapsula sa ecstacy, P1,500 nga buy bust money ug P1,500 nga gituohang halin ug mga ecstacy capsule.
Ang ecstacy usa ka matang sa gidiling drugas sama sa shabu, marijuana ug uban pa (BANAT NEWS)