CEBU, Philippines - Mga kasong kriminal ug administratiba ang giatubang karon ni Acting Governor Agnes Magpale ug lain pang unom ka opisyal ug kawani s a Kapitolyo ug lungsod sa Barili gumikan sa “illegal†nga pagsakmit nila sa tourist bus sa lungsod sa Barili sa milabay nga Pebrero 5, 2013 .
Ang mga kihante mao sila si Kapitan Nelson G. Gingoyon sa barangay Guibuangan; Kapitan Norman T. Anore Sr. sa barangay Mantalongon, pulos sakop sa lungsod sa Barili ug Ray T. Bayno ang watchman o nagbantay sa Pragmatic Development Construction Corp.(PDCC) sa Guibuangan.
Samtang kauban ni Magpale nga gikiha ngadto sa buhatan sa Deputy Ombudsman for the Visayas mao sila si Mayor Teresito Mariñas sa Barili, Eva Encavo, hepe sa Provincial General Services Office (PGSO); PINSP Arvi A. Arbuis, hepe sa Barili Police Station; mga kawani sa kagamhanan sa Barili nga sila si Vicente Villarin, Georgito Alquizola , George E. Quirante, ug lain pang 16 ka tawo nga wala na hinganli sa mga kihante.
Ang mga dokumento sa maong mga kiha nga nadawat sa Banat News kagahapon nagbutyag nga ang kasong kriminal ug administratiba nga gipasaka sa mga kihante ngadto sa mga respondente nanukad dihang giingong gipugos og kuha nila ni Encavo uban ni PINSP Arbuis, ug tulo ka kawani sa Barili nga giila na sa unahan ug laing 16 ka tawo nga wala na hinganli ang Sinotruck 6758 tourist bus nga walay pagtugot gikan sa nagbantay niini nga si Bayno, sa gipiyalan nga drayber sa maong sakyanan nga si Anore ug kang Gingoyon, ang bise presidente sa Liga ng mga Barangay, Barili Chapter kansang opisina maoy gitugyanan sa kagamhanan sa lalawigan sa pag-atiman sa maong sakyanan.
Nasuta sa maong kiha nga gilambigit sila si Magpale ug Mariñas tungod kay giingong sila ang nagmando sa mga hingtungdan pagpugos pagkuha sa maong sakyanan nga didto ibutang sa compound sa PDCC niadtong Pebrero 5.
Segun sa gipirmahang apidabit ni Gingoyon, Anore nasuta nga iyang gipundo ang maong sakyanan sa compound sa PDCC niadtong Pebrero 3, kay iya kining gipaayo sa mekaniko sa maong kompaniya nga giilang si Lising.
Sumala ni Gingoyon nga pipila sa mga depekto sa sakyanan nga iyang gipahiling mao ang mga brake drum niini, ang iyang wiper ug uban pa.
Apan matud pa ni Gingoyon nga nataymingan usab nga gipatawag si Lising sa iyang opisyal sa PDCC kay may gipaayo nga back hoe nga iya sa kompaniya sa Lapulapu city hinungdan nga nabiyaan sa maong higayon ang sakyanan nga natangtangan na og mga ligid.
Matud pa ni Gingoyon nga aron pagsiguro nga safety o luwas ang mga dapat sa sakyanan nga natangtang na sama sa mga ligid, mga bolt niini, tool box, jack tire air pressure guage ug sudlanan sa grasa. Iya kining gihakot ug gipundo sa barangay hall sa Guibuangan.
Midugang siya nga mao kini naabtan nila ni Encavo, ug mga kaubanan nga wala nay mga ligid ang maong sakyanan ug tungod kay nagdumili man sa pagsugot si Bayno nga ilang (Encavo) dad-on ang maong sakyanan, milihok si PINSP Arbuis ug mga kawani sa lungsod uban sa mga kauban niini pagpaguyod sa tourist bus ngadto sa munisipyo sa lungsod.
Gumikan sa ilang gihimo, naghiusa sila si Gingoyon, Anore ug Bayno sa pagsang-at og kaso batok sa mga respondent nga grave coercion, unjust vexation, slander by deed ug sa krimen nga carnapping ubos sa RA 6539 sa Anti-Carnapping Act of 1972 ,ug sa mga kasong administratiba nga mao ang grave misconduct, abuse of authority ug conduct unbecoming for public official.
Mahinumdoman nga niadtong Pebrero 5, 2013 human masakmit sa mga hingtungdang opisyal ug mga kawani sa kagamhanan ang tourist bus, mihulga si acting Governor Magpale nga papanubagon niya ang mga giingong mihimulbol sa maong sakyanan , samtang si Mayor Mariñas mibahad usab nga mopasaka og kiha sa mga nanghilabot sa mga pisa sa maong sakyanan.
Bahin ning maong kiha nga gisang-at karon batok kanila ni Magpale, Mariñas ug mga kaubanan, wala pa sila makahatag og pamahayag kalabot niini kay wala sila makontak sa Banat News sa pagsuwat ning balita bahin sa ilang reaction ning maong isyu. (BANAT NEWS)