Tangke sa LPG miulbo tempura vendor angol

CEBU, Philippines - Naangol ang usa ka tempura vendor dihang  mibuto  ang tangke  sa LPG nga  gikarga  sa iyang  traysikol  nga  gigamit  niya  sa pagpaninda  niya  og  tempura  atubangan  sa  eskuylahan  sa barangay Guiwang, lungsod sa Alcoy niadtong Lunes sa alas 12:00 sa udto. Ang biktima mao si Benigno Calvo,30 , minyo,  nga   taga barangay Giuwanon, lungsod sa Dalaguete,  ug  usa  ka   tempura vendor. Si PO2 Harris Almagro sa Alcoy Police Station  mibutyag sa Banat  News  nga samtang  namaligya  og   tempura  ang  biktima  kalit lang miulbo ang kayo   sa LPG  stove   niini  kay  gihapak  sa kalit  ug  kusog  nga  hangin.

Gumikan  kay  nasilab  ang  mga lingkoranan  sa iyang  traysikol, wala  kaikyas  ang  tangke  sa LPG  nga  diha  ra usab   ikarga  sa maong  sakyanan  ug  miulbo kini.

Ang biktima nga naningkamot unta nga mapawong ang kayo  napaso sa bukton ug lawas  samtang   hingpit gyud nga naugdaw ang traysikol  ug  ang  iyang  mga  baligya  gumikan  sa pagdako  sa kayo  mugna  sa miulbo  niya  nga  LPG.

Wala  pa  masuta  sa  kapolisan  ang  katibuk-ang  kantidad  sa  traysikol  ug  mga  baligya   sa biktima  nga  gihabhab  sa kayo. Samtang ang   biktima  gihatud  dayon  ngadto  sa tambalanan  gumikan  sa  iyang  mga  paso. (BANAT NEWS)