Sa minglanilla: lalaki gitulis gipatay; ex-BJMP trainee misuway og hikog

CEBU, Philippines - Patay ang usa ka batan-on nga factory worker nga gituohang gitulis samtang usa ka kanhi trainee sa Bureau of Jail Management and Penologoy ang misuway og hikog pinaagi sa pagdunggab sa iyang kaugalingon sa managlahi nga oras ug lugar sa lungsod sa Minglanilla.

Nabugtoan gyud sa iyang kinabuhi si John Bernie Apor, 19, nga nagtrabaho sa Nissin Philippines ug nagpuyo sa Kingswood Village, Barangay Lipata. Pasado alas-3 sa kaadlawon dihang padung na pauli gikan sa trabaho ang biktima dihang giingong usa ka wala mailhing lalaki ang mibabag kaniya ug diretsong nanunggab. Ang tanod sa maong barangay nga si Nelson Adlawan nga  nag-roving niadtong higayona maoy nakatagbo sa biktima nga nagkadugo na ug nangayo og pakitabang.

Hinungdan nga dali kining gidala ni Adlawan sa Minglanilla District Hospital apan paglabay sa pipila ka minutos nakabsan kini sa iyang kinabuhi.

Sa pakisusi sa kapolisan sa lungsod sa Minglanilla pinanguluhan ni PO3 Rangie Lopez, ilang nasayran nga nawala na ang cellphone sa biktima, nagduda sila karon nga posibleng gitulis kini apan misukol. Sa laing bahin, nagtulo ang dugo sa kalawasan ni Roldan Torion, 30, kanhi BJMP Trainee human kini nag-unay og dunggab sa iyang kaugalingon pasado alas- 7 sa buntag kagahapon diha sa Deca Homes Subdivision, Barangay Tunghaan.

Matud pa ni PO1 Noel Mamale sa Minglanilla Police nga ang biktima nag-unay og dunggab sa iyang kaugalingon sa makadaghang higayon ug migawas sa ilang panimalay.

Usa ka Jefferson Navarro, maoy nakakita niya ug mitawag

sa kapolisan. Sila si PO2 Vincent Heramil ug kaubanan   daling midala sa South General Hospital. Butyag pa ni Mamale nga base sa ilang nakuhang impormason dunay gikagul-an si Torion maong misuway kini og hikog. (BANAT NEWS)