Kagubot sa MCIA

CEBU, Philippines - Midangop ngadto sa korte ang mga tag-iya og tindahan sa Mactan-Cebu International Airport human kini gipasirad-an sa tagdumala sa tugpahanan kagahapon sa buntag.

Matud pa ni RTC Branch 53 Clerk of Court Atty. Andrea Maratas gipaabot sa usa ka concessioner nga si Nora Lañujan nga tag-iya sa “Arjin Pasalubong” ngadto sa korte ang iyang reklamo aron mangayo og TRO o “Temporary Restraining Order.”

Kini aron dili una ipaimplementar ang order ni MCIAA General Manager Engr. Nigel Paul Villarette nga papahawaon sila sa maong tugpahanan human mapildi sa bidding alang sa renovation sa maong bahin sa airport.

Ang Cesar Food Land maoy migawas nga bidder nga gitugotang maka-renovate, nga matud pa ni MCIAA legal officer Glenn Napuli nakatuman sa rekisitos ug nakasubay kini sa bidding rules and regulations. Sa petition ni Lañujan gipadayag niini ngadto sa korte ang dili makiangayon nga pagtratar sa MCIAA.

Matud pa niini ang kamandoan giluwatan ni Villarete niadtong Enero nga nag-ingon kutob na lang sila Marso 1.

Gidawat ni RTC Branch 53 Hon. Judge Anna Marie Melitante ang petisyon ni Lañujan ug gimandoan sa korte ang MCIA sa paghatag og komento niini sulod sa napulo ka adlaw.  (BANAT NEWS)