Dul-an 100 ka lugar sa CV ang gibutang sa election watchlist
CEBU, Philippines - Dul-an na sa usa ka gatos ka lugar sa Central Visayas ang gipaubos sa election watchlist base sa gipagawas nga data sa Regional Intelligence Division sa Police Regional Office-7 human sa gihimong validations sa maong mga dapit.
Ang hepe sa RID nga si Supt. Paul Labra, mibutyag nga aduna silay mga basehan aron mapaubos ang usa ka lugar sa election sa watchlist. Matud pa ni Labra nga pipila sa ilang gikuhaan og base ang intense political rivalry, ang lugar nakasinati usab og kagubot atol sa election, ang presensya usab sa mga armadong tawo ug ang presensya sa mga komunista.
Gipadayag ni Labra nga gawas sa maong basehan, aduna usab silay laing basehan sa mga aspeto aron mapaubos sa election watchlist ang lugar.
Gibutyag usab ni Labra nga ang tibuok kwatro distrito ilang gipaubos sa election watchlist nga naglangkob sa syudad sa Bogo, Daanbantayan, Madridejos, Medellin, San Remigio, Santa Fe, Tabogon, ug Tabuelan.
Gawas sa Sugbo, adunay 16 ka mga lugar nga gipaubos sa election watchlist samtang ang silingang probinsya nga Bohol gipaubos usab ang tanang lugar niini ang 48 ka munisipalidad ug dakbayan sa election watchlist.
Samtang ang Siquijor, unom ka mga dapit ang gipaubos sa election watchlist ug onse ka lungsod sa Negros Oriental ang naapil sa listahan.
Gibutyag ni Labra nga posibling mosaka pa ang gidaghanon sa lugar nga ilang ipaubos sa election watchlist o mokunhod ba kini mag-agad lang usab unya sa ilang pagahimoong pulong-pulong sa matag probinsya.
Samtang gitug-an usab ni Labra nga wala pay lugar nga ilang gipaubos sa under Comelec control. (BANAT NEWS)
- Latest
