Mandaue nag-kinahanglan og dugang firetruck

CEBU, Philippines - Dugang firetruck ug mga bombero ang  gikinahanglan sa 27  ka barangay sa dakbayan sa Mandaue isip tubag sa nagpadayon usab sa pagdagsang sa gipanukod nga mga buhatan ug mga balay patigayon sa kabarangayan

Si SFO3 Sherwin  Porcia nga maoy hepe sa Fire Safety Enforcement Section sa Bureau of Fire Protection sa maong dakbayan nga nahinabi sa Banat News miingon nga ang pagdugang og mga bombero ug mga firetruck gikinahanglan  kaayo  ilabi  na  karong  panahona  nga  kanunay  lang  mohugpa  ang  sunog  matag  karon  ug unya.

“I  am encouraging the barangay captains to procure a firetruck.” Even mini tanker,” pamahayag pa ni SFO3 Porsia tungod kay sa mga hagip-ot nga  mga lugar nga maigo sa sunog ang gagmay man nga mga firetruck  maoy mag-una sa pagpakalma sa nagdilaab nga kalayo, matud  pa  ni  Porcia.

Gitataw niya nga niining mga panahona ang barangay Tipolo, Paknaan ug barangay Opao mao lamang ang nagbaton og kaugalingong mga firetruck nga dako kaayo og gikatabang sa ilang pagtubag sa mga sunog nga moigo sa hagip-ot  nga mga lugar.

Dugang pa niya nga ang Action Emergency  and Rescue Team (ACERT)  sa maong  barangay  adunay  kaugalingong firetruck  nga  magamit  kun may  sunog  nga mahitabo  sa maong  lugar.

Base sa record  sa miaging tuig  nahimutang sa ikaduha  ang  Central Visayas nga may  labing  daghan  nga  nahitabong  sunog   nga mikabat og 51 ang tanan  sa tuig 2012. (/WC) (BANAT NEWS)