Typhoid fever sa Badian kontrolado na

CEBU, Philippines - Nagbutang na karun og temporaryong klinika ang kagamhanan sa lungsod sa Badian didto sa barangay Calangcang human gideklarar ubos sa Typhoid Fever outbreak ang maong lugar tungod sa 44 na ka mga kaso sa typhoid fever kon tipos ang na nasakit sa maong lugar.

Ang municipal health officer sa Badian Dr. Urduja Espiritu nagdestino na og mga nurse didto aron moatiman sa uban pang mga molupyo nga matakboyan sa sakit nga tipos.

Si acting Governor Agnes Magpale nagkanayon nga kontrolado na ang sitwasyon sa Badian.

Ang Badian District Hospital nakatala lang  kagahapon og dugang duha ka bag-ong pasyinte tungod sa tipos.

Si Dr. Imelda Pique sa Badian District Hospital miingon nga sagad sa mga nahibaw-an nilang nasakit wala na moadto sa tambalanan ug nag-ilaila na lang pagtambal sa ilang mga balay ug anha lang magpa-admit kun mograbe na.

Ang Integrated Provincial Office mipadala na og mga health personnel ug nasuta nga coliform bacteria maoy nakita sa tinubdang spring nga kuhaan sa ilimnon sa mga tawo.    Gitambagan hinoon nila ang mga molupyo nga pabukalan ang tubig sa dili pa kini imnon aron pagpatay sa kagaw.