Honorarium di mahimong ihatag matag buwan

CEBU, Philippines - Hayan nga dili tumanon ni Mayor Michael Rama ang sugyot sa mga sakop sa konseho sa dakbayan nga binuwan na ang pagpanghatag sa mga honoraryom sa mga opisyal sa barangay, tanod, Lupon ug uban pa.

Kun tumanan ang konseho sa ilang sugyot mora’g maglisud na ang mga kawani sa City Treasurer’s Office aron ihatag matag buwan ang maong mga honorarium, apil ang cash assistance sa mga senior citizens.

Gusto sa mga konsehal nga himoon na matag buwan ang pagpanghatag niini alang sa mga tanod, Lupon ug City Environmental Sanitation Enforcement Team nga manakop sa magpataka og labay sa mga sagbot diha sa dili tukma nga dapit. Si Rama miingon nga dili siya maniguro nga tumanon ang sugyot sa mga sakop sa Konseho kay mahago lang ang mga kawani sa City Hall kun matag buwan ang paghatag sa honorarium.

Mas gusto ni Rama nga ang paghatag sa honoraryom himoon matag tulo ka buwan kay wala nay laing mahimo ang mga kawani sa City Hall nga gitahasan niini gawas sa pag-andam sa maong mga gikinahanglan nga dokumento.

Ang mga konsehal miingon nga nahukman nila nga ang paghatag sa honorarium himoong binuwan aron dunay magasto kanunay ang mga hingtungdan.

Si Konsehal Sisinio Andales nga maoy chairman sa Committee on Laws sa Konseho namahayag nga dili kwestyonable kun ihatag kini og binuwan lakip ang cash assistance sa mga senior citizens.

Si Konsehal Jose Daluz III mireklamo kay si Andales abtik kaayo nga nakahimo og committee report sa  sugyot nga himoon na sa binuwan ang pag-release sa cash assistance sa mga senior, apan wala kini makahimo og committee report sa iyang sugyot nga ang pag-release sa cash assistance sa mga senior himoon matag tulo ka buwan. (BANAT NEWS)