Alegado ug kaubanan wa mahulga sa kiha

CEBU, Philippines - Wala mahulga  si Consolacion Mayor Teresita Alegado ug ang mayoriya sa konseho nga  gipangulohan ni Bise  Mayor  Aurelio Damole luyo sa  gisang-at  nga  kaso  batok kanila gumikan  sa ilang  pagpatukod  sa bag-ong  munisipyo  nga  mobalor  og P144 milyones.

Atol sa press conference nga gipatawag ni Mayor Alegado , Damole ug unom  ka  mga  konsehal  ug  18  ka kapitan  sa barangay kagahapon, gipasabot  sa mayor  nga  wala  sila mahadlok  sa kiha  nga  gipasaka  batok kanila  sa upat  ka konsehal  nga  oposisyon  ngadto sa buhatan  sa Visayas  Ombudsman.

`Kini  tungod  kay  matud  pa ni Alegado  nga nahisubay  ang  tanan  sa tukmang  panukdanan  ang  ilang  pag-apply  og  loan  gikan sa Development Bank of the Philippines (DBP).

Gitataw sa mayor  nga bugtong  tuyo  sa mga oposisyon nga  gipangulohan ni kanhi mayor Avelino Gungob mao  ang  pagdaut sa mga proyekto  nga giugmad ubos   sa iyang pamunoan sa pagtuo  nga  motuo  kanila  ang  mga  katawhan  sa lungsod.

Usa  sa nalagotan sa oposisyon  matud  pa  ni Alegado  mao  ang  katahap  niini  nga  makakomisyon  kuno  sila  og P40 milyones  sa maong  proyekto  kun mahinayon  ang  pagtukod  niini.

Gumikan  niini aron mapapas  ang  maong  katahap, mipasar og  resolusyon  ang  konseho  sa lungsod  nga iderekta sa winning bidder  ang P144 milyones nga  kuwarta  gikan sa bangko nga dili  moagi  ni  bisan  kinsang  opisyal  sa lungsod, matud  pa  ni  Alegado.

Gipasabot sa mayor sa Consolacion  nga  ipadayon gayud nila  ang  pagtukod  og  dakong  munisipyo  kay  ang  kasamtangang  balay lungsod  nila  gamay  ra kaayo alang  sa nagtubo  nga  populasyon  ug magbubuhis  sa lungsod.

Gani  ang  ubang  departamento  anaa  na  mag-opisina  sa gawas  sa munisipyo  kay  wala  nay  lugar  sa  sulod  niini.

Ang  Consolacion may  110 mil  na  ka  populasyon nga nagkinahanglan og tukmang serbisyo. Si  Mayor Alegado nagtuo nga mibabag  si Gungob  sa iyang mga proyekto tungod sa ambisyon niini pagpapili pag-usab  pagka mayor nga kaatbang  niya  sa eleksyon karong Mayo.

Si  Mayor Alegado kaalyado  sa Liberal Party ( LP) ni gubernatorial candidate Helario Davide III samtang si Gungob sakop sa One Cebu Party ni suspended governor Gwen Garcia. (BANAT NEWS)