Dul-an P.5milyon ang gahin alang sa Buhing Kalbaryo

CEBU, Philippines - Giuyonan sa konseho sa dakbayan sa Sugbo ang pagasto og dul-an sa tunga sa milyon ka pesos alang sa pagpahigayon og Buhing  Kalbaryo dungan sa paghandum sa Biyernes Santo unya sa Marso 29.

Si Mayor Michael Rama nahinangop kaayo nga wala supaka sa mga konsehal sa dakbayan ang sugyot nga sagubangon sa dakbayan ang P475,000 aron suportahan ang kalihukan sa mga 200 ka “out-of-school youths” nga mopahigayon sa Buhing Kalbaryo.

Ang mga mosalmot sa Buhing Kalbaryo mohulagway sa mga pag-antos ni Hesukristo.

Ang kalihukan anha manukad sa San Nicolas Parish grounds ug papas-anon si “Hesukristo” sa krus subay sa V. Rama Avenue paingon na sa Guadalupe Parish Ground diin adto himoa ang paglansang kaniya sa krus.

Si George Chu nga maoy project director sa Buhing Kalbaryo ning tuiga mipasabot nga ang P475,000 gastohon sa pagkaon sa mga moapil sa kalihukan ug sa uban pa nga gastohan sama sa ilang sinelas, streamers, pag-andam sa bantawan ug mga sapot nga ilang isul-ob.

Matud ni Chu nga tibook buwan sa Marso sila nga maghimo’g bansay-bansay mao nga sa pagkaon lang mogasto na sila og P268,800 samtang streamers mokabat og P95,000.

Ang ubang gastohan para na sa T-shirts, sinelas ug ubang panapton nga gamiton sa mga sumasalmot sa kalihukan.

Si Rama miuyon nga ang pundo adto kuhaon sa madawat sa dakbayan gikan sa Philippine Amusement and Gaming Corporation (Pagcor). (BANAT NEWS)