CEBU, Philippines- Mihiwasa sa kasuko kagahapon si Vice Mayor Marlon Garcia gumikan sa mga pasangil nga wala siya ug ang iyang mga konsehal maka-liquidate sa kapin sa P85 mil nga cash advances gikan sa ilang munisipyo sa lungsod.
Sa samang higayon mibahad siya nga mopasaka og kihang libelo batok ni Darrel Carumba, magsisibya sa Bantay Radyo gumikan sa pagbutyag sa naulahi sa maong isyu sa kahanginan.
Matud pa ni VM Garcia nga nahusay na kining tanan sa ilang tresurero sa lungsod nga siya ug ang iyang mga konsehal wala nay obligasyon o bayranan sa kuwarta sa lungsod nga nagamit nila sa ilang mga proyekto.
Midugang siya nga nahibulong siya nganong gituki pa sa hingtungdang magsisibya ang maong isyu nga unta dugay naman nila kining nahusay human nila madawat ang demand letter gikan sa buhatan sa panalapi sa lungsod.
Si VM Garcia nga mitawag kagahapon sa Banat News mipasalig nga iyang ipadala ang kopya bahin sa nahusay nga cash advances niya ug sa iyang mga konsehal.
Gumikan sa iyang kalagot mibahad siya nga mokiha og libel kun ipadayon pa ang pagdaot kaniya ug sa iyang mga konsehal gumikan sa maong isyu nga nasulbad na.
Hinuon sa bahin ni Carumba kinsa usa usab sa correspondent sa Banat News kini miingon nga kun nahusay na ni VM Garcia ug sa mga konsehal niini ang ilang cash advances, wala siya masayud niini.
Giangkon niya nga malagmit ang gitunol kaniya nga papeles mao tingale kadtong dokumento sa wala pa mahusay ang maong cash advances ni VM Garcia ug sa iyang mga konsehal.
Midugang si Carumba nga gusto usab siyang mangayo kang VM Mayor Garcia sa maong papeles aron iya usab kining ikasibya sa kahanginan pagpahibawo sa ilang tigpaminaw nga nahusay na ang maong isyu. (BANAT NEWS)