CEBU, Philippines - Nasikop sa kapolisan ang usa ka tawo nga suspetsado sa pagtulis sa 15 anyos nga dalagita didto sa Manong Amon Plaza, barangay Poblacion, dakbayan sa Danao sa miaging kaadlawon.
Ang nasikop mao si Dondie Batulan, 24, ulitawo nga taga barangay Malapoc, dakbayan sa Danao kinsa nadakpan nila ni PO1 Mark Anthony Mata ug PO1 Reagan Perilla sa kapolisan sa nahisgotang lungsod.
Ang suspetsado maoy gitumbok nga nagtulis kang Eva Mea Jaime, nga taga barangay Looc kinsa miasoy nga naglakaw kini sa maong lugar alas 2:00 pasado sa kaadlawon paingon sa merkado dihang kalit lang kining gisugat sa armado nga lalaki dayong tion sa iyang armas ug mideklarar nga tulis.
Matud pa sa biktima nga human makuha sa tulisan ang iyang cell phone dali kaayo kining milayas samtang walay nahimo ang biktima gawas sa pagdangop sa buhatan sa kapolisan.
Si PO2 Rocelo Campo sa kapolisan sa maong dakbayan nga nahinabi sa Banat News miingon nga sa follow up operation nasigpatan nila ni PO1 Mata ug PO1 Perilla ang maong suspetsado nga naglakaw sa dalan national sa barangay Looc sa maong dakbayan.
Ang biktima nga mikuyog sa sa kapolisan sa maong higayon dali kaayo nga miila sa suspetsado nga maoy nagtulis niini. Gipahunong dayon nila ni PO1 Parilla ang maong suspetsado nga naglakaw paingon na sa ilang balay ug girikisa ang kalawasan niini.
Didto nakuotan nila sa bulsa sa suspetsado ang cell phone sa biktima.
Gitangggong kini karon s a kapolisan aron kapasakaan og tukmang kaso. (BANAT NEWS)