CEBU, Philippines - Usa ka barko ang nasangad diha sa likod nga bahin sa parola sa Lawis Ledge sa kadagatan sa lungsod sa Cordova samtang naglawig gikan sa Cagayan de Oro padulong sa Sugbo. Luwas hinuon ang mga pasahero ug tripulante sa M/V Trans Asia 9 sa maong aksidente.
Si Gregorio Dela Torre, hepe sa Fisherman Sea and Ecological Care (FISECA) sa dakbayan sa Talisay mibutyag kagahapon sa Banat News nga ang maong barko diha miagi sa likod sa parola imbes anha sa atubangan nga hunasan.
Sa laing bahin, Cebu Coast Guard Station Commander, Weniel Azcuna nga nahinabi sa Banat News kagahapon mibutyag nga ang M/V Trans Asia 9 dunay kargang 360 ka mga adult nga pasahero, upat ka mga infants ug 72 ka mga officers ug crew.
Ang PCG mohimo og dugang imbestigasyon sa maong hitabo ug gimandoan na ang kapitan sa barko nga si Gregorio Opianga pagsumitir og Marine Protest.
Sa laing bahin, si Kenneth Sy, chief executive sa Trans Asia Shipping Lines nagkanayon nga luwas ang tanang pasahero ug mipasalig nga mo-kooperar sila sa inspection nga gimando. Matud ni Sy nga na-miscalculate sa barko ang pag-agi sa lugar ilabi na nga hunas niadtong higayona. (BANAT NEWS)