CEBU, Philippines - Wala aprobahi sa mga konsehal sa dakbayan sa Sugbo ang gisugyot ni Mayor Michael Rama nga hatagan og tag P7,000 nga Charter Day bonus ang matag usa ka kawani sa City Hall. Apan ang wala nila pag-aprobar sa gisugyot nga ordinansahon ni Rama atul sa budget hearing kagahapon mao nga gusto sa mga konsehal nga himoong P10,000 ang Charter Day bonus.
Si Rama miingon nga patun-an niya sa iyang mga sinaligan nga opisyal sa City Hall kun mahimo ba nga tumanon ang tinguha sa mga konsehal.
Matud ni City Accountant Diwa Cuevas nga dunay igo nga “retained operating surplus†ingon man “prior years adjustment and other deferred credits†nga kakuhaan sa gikinahanglan nga kantidad. Mogasto og dul-an sa P50 milyones ang paghatag lang og Charter Day bonus nga tag P10,000 matag usa ka kawani.
Si Konsehal Noel Eleuterio Wenceslao nga maoy vice chairman sa Committee on Budget and Finance ug maoy nag-preside sa budget hearing kagahapon miingon nga gusto gani unta nila nga tag P20,000 ang ihatag nga bonus sa matag kwani. Mga kawani sa City Hall nga nasayud sa maong kalamboan wala magbagolbol nga malangan ang pag-aprobar sa ilang Charter Day bonus tungod kay nakasabot sila nga pabor kini kanila. (BANAT NEWS)