CEBU, Philippines - Kagamhanan sa lungsod sa Minglanilla, mga mag-uuma sa lungsod, simbahan ug Rotary Club Cebu (RCC) migama og Memorandum of Agreement (MOA) kabahin sa permaculture project kagahapon sa buntag diin ang maong kalihukan gipahigayon diha sa session hall sa lungsod. Si Jonathan Gesalem, presidente sa RCC mipasabot nga ang permaculture mahitungod kini sa ideya sa pagdesinyo sa usa ka luna nga magamit sa agrikultura dili lang sa pagpananom lakip na usab niini ang pagbuhi og mga hayopan ug uban pa.
Matud niya nga ang barangay Cadulawan ug Veto aktibo kaayong mitubag sa ilang tanyag kabahin sa proyekto hinungdan nga maoy napiling mga pilot barangay ug kung magmalamboon kini ipaambit usab nila ngadto sa ubang barangay sa lungsod.
Ang mga mag-uuma dili usab kini maglisud sa ilang mga abot tungod kay ang RCC motabang man kanila og pangita og mga buyer.
Gawas niini ang RCC maoy mosuplay sa mga gikinahanglan nila kabahin sa proyekto.
Si Gesalem mihangyo sa mga mag-uuma nga bugtian og kakugi ug paghatag og importansiya ang ilang tabang.
Gibutyag ni Gesalem nga mokabat ngadto sa P120 mil ang magasto sa duha ka semanang training kabahin sa permaculture.
Si Konsehal Robert John Selma, chairman sa committee on agriculture sa konseho sa lungsod nagkanayon kini nga ang lokal nga kagamhanan isip third party sa MOA ang ilang obligasyon mao ang pagprotekta sa mga mag-uuma, motabang sa superbisyon sa pag-implementar sa permaculture design, moabag usab sa pinansiyal nga panginahanglanon ug uban pa.
Si Felomina Cañedo, presidente sa RCC, Minglanilla nagkanayon kini nga sa pagkakaron walo ka mag-uuma lang una ang beneficiaries sa maong proyekto ug walo ngadto sa siyam ka ektaryang luna lang usab unang sugdan sa permaculture project.
Si Ernesto “Boy†Laroa presidente sa mga mag-uuma nagkanayon kini nga mapasalamaton sila sa maong tabang aron sila mahaw-as sa kalisud.
Si Samsam Gullas kinsa maoy representante sa iyang apohan nga si Kongresista Eduardo Gullas sa unang distrito ug 4th party sa MOA nagkanayon kini wala siya’y alamag kabahin sa agrikultura o panguma apan iyang isaad nga motabang sila pinaagi sa paghatag og pinansiyal nga tabang sa maong proyekto aron kini magpadayon ug mapahimuslan pa sa mga umaabot.
Sa laing bahin, si Bert Peteers nga usa ka Belgian national kinsa nagpuyo na nganhi sa nasud sulod sa 22 na ka tuig ug eksperto sa permaculture maoy mitabang sa paghatag og mga training sa mag-uuma. (BANAT NEWS)