CEBU, Philippines - Patay na nga naabtan sa inahan ang usa ka ulitawong anak niini kinsa nagpusil sa iyang kaugalingon sulod sa ilang balay sa barangay Colawin, lungsod sa Argao niadtong Huwebes sa alas 1:30 sa hapon.
Ang nagpakamatay mao si Sherwin Calledo, 30, ulitawo, walay klarong trabaho.
Si PO2 Benjamen Gerozaga sa Argao Police Station mibutyag sa Banat News nga ang inahan niini nga si Jovita Calledo, milakaw, nanguha og kahoy nga igsusugnod sa maong higayon.
Apan sa iyang pagbalik nakugang na lang kini dihang nakita niini ang anak nga nagtakilid nga naghigda sa salog nga kawayan ug nagkadugo hinungdan nga misinggit siya ug nangayo og panabang sa mga tanod ug konsehal sa barangay nga ilang silingan.
Sa pag-responde sa mga polis nasuta nga milapos ang bala gikan sa walang tampihak sa maong ulitawo ngadto sa pikas tampihak niini nga maoy nakaingon sa iyang hinanali nga kamatayon.
Ang kapolisan nakapunit sa kalibre 38 nga paltik revolver tupad sa patay’ng ni Calledo. Nasayran usab sa kapolisan gikan sa ginikanan ni Calledo nga nagkasakit kini og nervous breakdown sa milabay’ng tuig .
Sa samang higayon ilang giawhag ang mga ginikanan niini nga ipa-autopsy gyud ang iyang lawas sa pagtino kun wala bay foul play ang iyang kamatayon.( /WC) (BANAT NEWS)