CEBU, Philippines - Nailhan na sa kapulisan ang lalaki nga biktima sa “salvage†nga gilabay ang patay’ng lawas sa pangpang apan nasangit sa kakahoyan sa Sityo Madolinog Poblacion sa lungsod sa Borbon niadtong Miyerkules sa alas 9:00 sa buntag.
Ang biktima giila sa iyang asawa nga mao si Nixon Rosales Jumao-as, 38, usa ka car dealer ug molupyo sa Gorordo Avenue sa dakbayan sa Sugbo.
Matud ni PO3 Jose Cejano sa Borbon Police dihang nahinabi sa Banat News, ang asawa sa namatay nga si Raquel maoy miila sa biktima diha sa punerarya sa lungsod.
Ang biktima nakit-an kini sa kawani sa lungsod sa Borbon nga si Merly Cansancio samtang naglakaw sa maong lugar paingon sa munisipyo nga nagbitay sa pangpang daplin sa karsada.
Ang lugar nga gilabayan sa biktima gihulagway nga mingaw ug distansya sa mga pinuy-anan sa maong lugar hinungdan nga walay nakamatikod sa paglabay kaniya. (BANAT NEWS)