Bata gikulata ug gihulgang patyon sa polis, mireklamo

CEBU, Philippines - Usa ka menor de edad ang mireklamo nga gikulata sa usa ka polis nga nadestino sa lungsod sa Boljoon kaniadto ug nabalhin na sa lungsod sa Alcoy.

 Ang maong menor de edad nga nagpangidaron og kinse anyos mireklamo nga gipatid-patiran, gisukmag ug gihudlat nga patyon sa maong polis.

Matud pa sa menor de edad dihang nahinabi sa Banat News nga niadtong Pebrero 15 ning tuiga, siya ug iyang higala ug hinigugma didto sa usa ka payag nga nahimutang sa barangay Poblacion lungsod sa Boljoon.

Ang polis (pangalan gipugngan sa Banat News hangtud di masang-at ang kaso)  kalit nga nibutho ug nangita sa iyang onse anyos nga anak.

Ang mga higala sa reklamante nga nakalitan sa pagbutho sa polis nakatubag nga wala sila makahibalo. Apan ilang gitudlo ang biktima nga sila ug ang anak sa polis maoy uwahing nagkuyog. Diha–diha giingong giingnan siya sa maong polis og ‘way lakaw’  dungan sa pagbunot sa iyang armas.

Sumala pa sa bata gibunlot siya sa polis ug gipangutana og balik nga ‘Asa akong anak? Papusil ka?” gisundan kini dayon og sukmag diha sa iyang kuto-kuto.Gidala siya sa polis ug giingnan nga “papusil ka, sakay dire.”

Gidala siya niini sa balay sa polis ug didto subli siyang gihulga sa pag-ingon “Bisa’g kinsa pa ka, ipakalas tika, bisa’g asa pa ka reklamo.” Nasuta nga nakauli na diay ang anak niini. Tungod niini nalisang na ang bata ug dili na kaayo mogawas sa ilang panimalay sa kahadlok nga tinud-on siya og patay sa polis.

“Kulbaan ko uy, panalagsa na lang gani mi molaag sa amoa kay mahadlok ta ba, polis baya na siya,” matud pa sa menor de edad. Giklaro usab sa biktima nga wala silay relasyon sa anak sa polis sukwahi sa pagtuo sa polis nga aduna silay relasyon.

Ang duha ka saksi mibutyag usab nga diha sila sa dihang gikulata ang biktima ug gani, katabangon unta sila apan wala silay mahimo tungod kay polis ug armado pa gyud kini.

Ang Women’s Desk sa Boljoon Police nga si SPO1 Christina Pantojan mibutyag sa Banat News nga na-blotter sa ilang buhatan ang maong reklamo.

Apan human nila matambagi nga magpa-medical checkup ang bata mikuha na sila og abogado aron maoy mopasaka sa kaso batok sa maong polis.

Mipasabot si Pantoja nga wala na sila mopalalom pa sa imbestigasyon human ang pamilya sa biktima mikuha naman og kaugalingon nilang abogado.

Matod pa ni Pantoja nadala sa emosyon ang maong polis tungod sa kabalaka ngadto sa iyang anak. Ang Banat News misuway og kontak sa maong polis aron makatubag sa pasangil batok kaniya apan napakyas ang maong tinguha tungod kay di makontak ang telepono niini.  (BANAT NEWS)