Ulo sa lalaki gipakong sa bato patay
CEBU, Philippines - Usa ka mag-uuma ang napalgang nagkadugo ug wala nay kinabuhi diha sa barangay Sirao sa bukirang bahin sa dakbayan sa Sugbo sa nakalabay’ng gabii.
Ang biktima nailhan nga si Eduardo Relosa, 48, molupyo sa maong lugar ug gituohang adunay kakulian sa pangisip. Sa pakighinabi sa Banat News ni PO3 Lou Pagara sa Homicide Section, misaysay kini nga uwahing nakit-ang buhi sa mga silingan si Relosa, nagpunay kini og pakong sa iyang ulo sa poste sa suga diha sa ilang dapit.
Paglabay sa pipila ka minutos nakit-an sa molupyo si Relosa nga nagbuy-od na ug naglunang na sa kaugalingong dugo.
Dako ang pagtuo ni Pagara nga posibleng gipangka usab sa biktima ang iyang ulo ngadto sa dakong bato duol sa dapit diin mahagba ang iyang lawas, usa ka dakong bato nga dunay mga lama sa dugo ang nakit-an sa lugar. (BANAT NEWS)
- Latest
