Mga sugarol target sa vigilante?

CEBU, Philippines - Gibinaklid ang mga kamot sa usa ka lalaki nga napalgang wala nay kinabuhi pasado alas-3 sa kaadlawon diha sa may 4th Street Horseshoe Hill sa Banawa, barangay Guadalupe sa dakbayan sa Sugbo.

Ang mga “killers” may bahad pa ngadto sa mga ‘financiers’ nga sila maoy isunod kung dili sila mohunong. Wala hinuon giklaro sa paskin kung financiers ba sa illegal nga sugal nga masiao o jai alai ang gipasabot sa mga killers.

Apan base sa naunang mga impormasyong nakuha sa kapolisan giingong usa ka usher ang biktima gawas sa pagpamasahero.          

Ang biktima giila sa ngalang Marlon Reyes, 38, molupyo sa sitio Sudlon, barangay Maguikay sa dakbayan sa Mandaue.         

Ang Mobile Patrol Group nakadawat og tawag gikan sa usa ka wala magpailang tawo nga nagbutyag nga adunay tawong napalgang patay sa maong lugar.         

Ang kapolisan sa Homicide Section nga misusi sa lawas sa biktima ug ilang nasuta nga gawas sa samad pinusilan aduna usab kini marka sa iyang liog nga susama og gibitik og alambre.         

Nagkwintas ang biktima og belt bag nga adunay tally sheets sa sulod niini. Labaw sa tanan, adunay note nga nag-warning sa mga financier.         

Ang paskin nagkanayon “sample lang ni, ug di mo mo-undang kamo ang isunod mga financier.”         

Matud pa ni SPO4 Alex Dacua sa Homcide Section posibling gilabay lang sa maong lugar ang biktima apan gipatay kini sa lain nga lugar.          Dugang pa ni Dacua nga ila pa usab nga sutaon ug kUn usher ba gyud ang biktima tungod usab sa nakuhang mga tally sheets sa patay’ng lawas.         

Samtang dako usab ang pagduda sa kapolisan nga posibling usa lang kini  ka  “diversionary tactic” sa killers aron mawani ang mga imbestigador sa ilang pagsubay sa tinud-anay nga motibo.         Dunay samad pinusilan sa tiyan, suwang ug  liog ang biktima  ug usa ka basiyo sa bala sa kalibre.45 ang nakuha diha sa crime scene.

Apan si Sr. Supt. Mariano Natu-el Jr., ang kasamtangang officer-in charge sa Cebu City Police Office sa interbyu sa Balitang Bisdak kagahapon miingon nga ilang gitan-aw ang anggulong personal ang motibo sa krimen.

Gisalikway dayon ni Natu-el nga mibalik na usab ang operasyon sa mga ‘vigilante’ ug ang mga target mao ang mga ushers, coordinators ug financiers sa illegal nga sugal nga masiao.

Posibleng gi-divert lang sa mga killers ang atensyon sa mga polis pinaagi sa pagpagawas nga usher sa illegal nga sugal ang biktima.

Samtang nagduda usab si Natuel sa mga samad sa biktima nga dili inagian sa calibre 45 pistola tungod sa kagagmay niini.

Ang kapolisan sa rehiyon partikular ang Cebu City nangusog sa ilang kampanya kontra illegal nga sugal diin kada adlaw dunay mga tawong nalambigit sa sugal ang nangadakpan.

Niadtong milabay’ng gabii, dose ka pinball machines sa Duljo-Fatima ang gipangsakmit.  (BANAT NEWS)