CEBU, Philippines - Dili mominus 20 ka mga batid nga doctor ug mga nurse gikan sa kaulohan ang mopahigayun og free medical and surgical mission sa isla sa Kinatarkan sa lungsod sa Sta Fe, isla sa Bantayan karong Sabado. Ang maong kalihukan gipasiugdahan ni Mr. Jose “Titing†Esgana ug sa katibuk-ang Team Esgana aron paghatag og libreng serbisyo sa mga kabus nga molupyo sa maong isla.
Ang mga serbisyo naglakip sa libreng paghatag og tambal ug libreng check -up ilabi na sa mga may balatian ug mga kabataan. Ang Political Strategist sa Team Esgana, Mr. Paulo Esgana barangay councilor sa Talisay, Sta. Fe mipasabot nga target nila nga moabot og 5,000 ka mga kabus nga molupyo ang giandaman nila nga makapahimulos niining maong medical and surgical mission.
Matud ni Esgana nga gawas sa libreng pagpakonsulta niadtong dunay mga balatian nga molupyo sa isla mang-apod-apod usab kini og libring mga tambal.
Usa ka molupyo sa maong isla nga si Guillermo Gilbuena mipadayag og tumang kalipay sa gitakdang pagpahigayon og free medical and surgical mission karong adlaw’ng Sabado tungod kay sukad- masukad mao pa kini labing una nga napahigayon sa ilang lugar.
Gipasalamatan nila si Mr. Jose Esgana nga maoy usa sa naningkamot pinaagi sa iyang pagpakig-alayon sa mga inilang negosyante ug higala sa kaulohan aron madala sa isla sa Kinatarkan ang mga batid nga doctor gikan sa kaulohan. Si Esgana nagpapili pagka- mayor atbang ni Mayor Jennifer Ilustrisimo sa maong lungsod karong umaabot nga eleksyon sa Mayo. (BANAT NEWS)