CEBU, Philippines - Nahanugon kaayo ang mga sakop sa Association of Barangay Council ( ABC) sa lungsod sa Barili sa tourist bus nga gibawi ni acting Gobernador Agnes Magpale.
Matud ni Barili ABC Vice President ug Guibuangan Barangay Captain Nelson Gingoyon nga nakatabang unta kaayo ang maong sakyanan nga gihatag kanila ni suspended governor Gwendolyn Garcia sa ilang mga konstituwente nga buot mobiyahe sa ubang mga lugar sa lalawigan,
Midugang si Gingoyon nga anugon kaayo ang panahon nga napundo lamang karon ang maong sakyanan sa munisipyo nga unta mahimo man kini nga ipaayo aron magamit sa mga biyahe sa ilang tagi-barangay.
Kahinumdoman nga gibawi ni Magpale ang nahisgutan nga tourist bus gikan sa ABC sa Barili niadtong Pebrero 5 ning tuiga nga walay pormal nga pahibawo ngadto sa hingtungdang mga opisyal nga gipiyalan sa pagdumala sa maong sakyanan. Gumikan sa illegal nga pagbawi sa kasamtangang gobernador sa maong sakyanan giandam na ni Bise Mayor Marlon Garcia ang kiha batok kang Magpale ug ubang mga opisyal sa Barili. (BANAT NEWS)