CEBU, Philippines - Mitahan sa kapolisan sa lungsod sa Consolacion ang duha ka bayong-bayong kinsa suspetsado sa pagpusil sa usa ka 19 anyos nga mga lalaki didto sa barangay Pitogo sa lungsod sa Consolacion sa miaging gabii.
Ang duha nga pulos tag-16 anyos ang panuigon nga taga barangay Nangka mitahan kang PO3 Edmund Melendres sa kapolisan sa maong lungsod human makumbinser ang mga ginikanan niini.
Si PO2 Glenn Rosal sa kapolisan sa maong lungsod nga nahinabi sa Banat News miingon nga ang duha ka batan-on maoy suspetsado sa pagpusil kang Ralph Almendras, 19 , nga taga barangay Tayud sa nahisgotang lungsod. Sa nasayran , ang biktima nga si Almendras giingong kuyog sa iyang mga barkada nga nag-inom sa usa ka tindahan sa maong dapit alas 3:00 pasado na ang takna sa kaadlawon sa miaging Biyernes.
Dugang pa ni PO2 Rosal nga samtang nakig-estorya ang biktima sa mitawag kaniya sa iyang cellphone kalit lang mitumaw ang motorsiklo nga giluwanan sa mga suspetsado ug gipusil ang biktima sa makadaghang higayon nga maoy hinungdan sa grabe niining pagkaangol.
Gihatud dayon sa iyang mga barkada ang biktima ngadto sa Cortes General Hospital sa dakbayan sa Mandaue apan gibalhin kini sa pribadong tambalanan sa dakbayan sa Sugbo. (BANAT NEWS)