Ulo sa 40-anyos napusa pagligis sa Ceres bus
CEBU, Philippines - Patay ang usa ka 40- anyos nga lalaki human malatayi sa ligid sa Ceres bus dihang nasaliring kini taliwala sa karsada tungod sa pagdumbol kaniya sa usa ka motorsiklo diha sa highway sa Sityo Puntod barangay Calajoan lungsod sa Minglanilla alas 2:00 pasado kagahapon. Ang biktima nga patay diha diha ug dili na maila ang napisat nga nawong mao si Babel Navarro alyas Babi boy, 40, nagpuyo sa Bahada siyudad sa Talisay ug nagtrabaho sa maong lugar.
Ang nakaligis patay mao ang Ceres bus nga gimaneho ni Roberto Redobles Gemina, 42, taga Lahug Gorordo Avenue sa Purok-3 barangay Kamputhaw siyudad sa Sugbo.
Samtang ang drayber sa motorsiklo nga una nang nakadumbol sa biktima wala pa makuha ang pangalan tungod kay nalandig sab kini didto sa Minglanilla District Hospital human maangol dihang nalamba ang motorsiklo niining gisakyan human makadumbol.
Matud ni PO1 Rodolfo Quilala sa Minglanilla District Hospital dihang nahinabi sa Banat News gisugo ang biktima sa iyang amo nga si Maning Villordon sa pagpalit og pang- snacks. Apan pagtabok niini sa dalan nadumbolan kini sa motorsiklong padulong sa Cebu City ug pagkatumba sa biktima nalatayan ang ulo niini sa mga ligid sa nagsunod nga bus.
Ang drayber sa motor ug ang Ceres bus pulos naglumba og ikyas sa dapit. Ang drayber sa motor didto milahos sa tambalanan samtang sa Talisay City Police station mitahan ang drayber sa bus. (BANAT NEWS)
- Latest
