CEBU, Philippines - Gidudahan nga nuog nga giitsahan og upos sa sigarilyo ang hinungdan sa sunog nga miugdaw sa duha ka balay sa Brgy. Mactan dakbayan sa Lapulapu kagahapon sa kaadlawon.
Ang maong balay gipanag-iya nila ni Rogel Soronio ug Lito Casio nga mga residente sa maong dapit atbang sa balay ni Mayor Paz Radaza.
Sa pasiunang imbestigasyon nga gihimo ni FO2 Climaco Salisid sa Lapulapu City Fire Department nagsugod ang kayo sa balay ni Soronio.
Ang bagang nuog sa sulod niini gidudahan nga nalabayan og upos sa sigarilyo nga maoy sinugdanan sa pagkaylap sa kayo.
Gumikan kay kasikbit usab ang balay ni Casio nga gama sa mga materyales nga kahoy dali usab kaayo kining gisilab sa nagdilaab nga kayo gikan sa balay ni Soronio.
Daghan pa untang mga kasilinganang mga balay sa maong lugar nga maugdaw kun wala pa moabot dayon ang mga trak sa bombero.
Hinuon walay kinabuhing nakalas ug naangol atol sa maong sunog apan nagbilin kini og danyos nga gibana-banang mikabat sa P80 mil.
Ang alarma sa maong sunog nadawat sa buhatan sa bombero sa alas 4:02 sa kadlawon ug gipaubos kini sa 2nd alarm ug nakontrolar sulod sa dos minutos. Padayon pa ang imbestigasyon nga gihimo sa kabomberohan aron pagtumbok sa tinuod nga sinugdanan sa maong sunog.( /WC) (BANAT NEWS)