CEBU, Philippines - Midangop sa kapolisan sa lungsod sa Cordova ang ginikanan sa usa ka dalagita tungod kay wala na kini mahiuli sa ilang balay tulo na ka adlaw ang milabay ug gituohang gitaban kini sa iyang uyab nga taga Mindanao.
Ang maong dalagita nag-edad pa og 15 anyos ug nagtungha sa usa ka public high school sa ilang lungsod kansang uyab nga nagpangidaron og 40 anyos giingong kuwartahan apan ang trabaho mao ra ang pagpunay og majong ug magdala-dala og awto nga walay plate number.
Hinuon ang ngalan sa maong lalaki gitugyan sa mga ginikanan sa dalagita ngadto sa kapolisan sa Cordova.
Si PO3 Manfred Maarat sa kapolisan sa maong lungsod nga nahinabi sa Banat News miingon nga subay sa gitug-an sa ginikanan nga ang dalagita sayo pa sa buntag sa miaging Sabado nananghid nga molakaw kay moadto sa ilang tulunghaan. Apan gibati na sila og kabalaka dihang wala na kini mopauli hangtud sa pagsulat ning maong balita.
Misamot ang ilang kabalaka dihang mitug-an ang ilang mga silingan nga nakit-an nila ang maong dalagita nga misakay sa awto sa lalaki.
Matud pa sa mga ginikanan nga ang maong lalaki lumad nga taga Mindanao apan temporary kining nagpuyo sa barangay Dapitan, Cordova.
Ang team sa kapolisan sa maong lungsod nga gipangulohan ni PO3 Rovilo Librado nakasigpat sa sakyanan sa maong lalaki nga giabandonar sa dakbayan sa Lapulapu. Dihang ilang gisusi ang sulod niini, wala sila makakaplag og rehistro ug wala usab kini plate number nga nakapatumaw sa katahap sa kapolisan nga kinarnap ang maong sakyanan. (/WC) (BANAT NEWS)