V-Hire nadasmag sa Ceres, 3 angol

CEBU, Philippines - Tulo ang naangol, duha niini  mga  Korean national dihang nidasmag sa Ceres bus  ang ilang gisakyan nga van didto sa Sitio Lamac barangay  Don Gregorio Antigua ,lungsod sa Borbon niadtong Domingo sa alas 4:00 sa hapon.

Ang mga angol mao ang drayber sa V-Hire  van nga si Glecerio Munez, 48 , minyo, ug nagpuyo sa Babag-2 siyudad sa Lapulapu , ug ang duha sa iyang mga pasahero nga sila si Seong Hee Yoon, ug Nam Gukhe, pulos  hingkod  nga  mga Korean national.

Samtang ang drayber sa Ceres Bus naila nga si Julito Villacin, 48, minyo, nga   taga Candugay lungsod sa Barili.

Si SPO2 Owen Baticuang sa Borbon Police Station  mibutyag  sa Banat News  nga ang duha ka sakyanan pulos paingon    sa dakbayan sa Sugbo gikan sa dakbayan sa Bogo. Apan  sa  pag-abot sa nahisgutang lugar kalit nga mihunong ang Ceres Bus  kay  may  mipara  nga  pasahero   ug  tungod  kay  wala  makabantay  ang  drayber  sa V-Hire  nadasmag kini sa luyong bahin sa  Ceres.

Gumikan  niini  naparok ang ulo sa mga biktima ug napangos  usab  ang    ilang  mga lawas  nga nabunal sa  mga  lingkoranan  sa sakyanan  ug misangko  sila  sa Juan Dosado Hospital sa   barangay Damolog, lungsod  sa  Sogod.

Hinuon  gi-transfer   usab  dayon  sa tambalanan  sa dakbayan sa Sugbo. Way  nakitang kalapasan sa  bahin  sa  Ceres bus tungod kay  ang  V-Hire  van maoy midasmag sa luyong bahin  niini (/WC). (BANAT NEWS)