Pagpaluag sa trapiko patun-an sa Citom
CEBU, Philippines - Ang mga konsehal sa dakbayan sa Sugbo miawhag sa Cebu City Traffic Operations Management (CITOM) nga mohimo sila og traffic impact assessment ug misugyot sila’g pamaagi nga makapaluag-luag sa dagan sa mga sakyanan.
Si Konsehal Noel Eleuterio Wenceslao mihimo sa maong awhag human niya mapanid-i nga grabe na kaayo ang problema sa trapiko dinhi sa dakbayan sa Sugbo.
Pinaagi sa pagpahigayon og traffic impact assessment matimbang-timbang kun unsa ang maayong buhaton aron nga maiban-ibanan ang maong problema.
Ang record sa Land Transportation Office (LTO) nagpakita nga dinhi sa Central Visayas ang mga sakyanan madugangan og kapin sa 20,000 matag tuig apan walay bag-ong mga karsada nga gimugna ug wala usab kaayo’y pagpalapad sa karsada.
Matud ni Wenceslao nga sila sa konseho andam maminaw sa sugyot sa CITOM, kinsa gihulagway nila nga takus mohatag kanila og sugyot kay ang CITOM gilangkoban sa mga representante sa lainlaing sector. Dunay sugyot nga kadtong mga karaan na kaayo nga sakyanan, ilabi na kun wala na kaayo maatiman, dili na tugutan nga makadagan.
Usa ka opisyal sa CITOM miingon nga kun dili kontrolahon sa kagamhanan ang pagrehestro sa mga sakyanan mahimong muabot ang panahon nga ang dakbayan sa Sugbo mahisama sa Manila nga halos dili na mulihok ang mga sakyanan.
Dinhi sa Sugbo, dunay mga politiko nga supak nga sundon ang gihimo didto sa Manila nga gipatuman usahay ang “Odd-Even†nga pamaagi diin ang mga sakyanan nga padaganon ibasi sa kataposang numero sa iyang plate numbers.
Gihulagway ang maong paagi nga “anti-poor†kay ang mga adunahan makabaton man og sakyanan nga aron kanunay sila nga makabiyahe bisan dunay “Odd-Even†nga paagi nga ipatuman. (BANAT NEWS)
- Latest
