CEBU, Philippines - Sa unang higayon ang koleksyon sa City Traffic Operations Management (CITOM) sulod lang kaniadtong buwan sa Enero miabot og kapin sa pito ka milyon ka pesos.
Matud ni CITOM executive officer Rafael Christopher Yap nga sa Enero kaniadtong miaging tuig ang koleksyon sa CITOM miabot lang og P4,171,285 samtang karong tuiga P7,754,602.
Ang mga konsehal sa dakbayan sa Sugbo mipahalipay sa mga sakop sa CITOM ilabi na nga usa sa rason nga misaka ang ilang koleksyon tungod sa paghingusog nila sa pagpanakop.
Ikaduha lang nga rason nga ang pagsaka sa ilang koleksyon nagumikan sa pagpausbaw sa kantidad sa parking fee sa mga sakyanan nga moparking sa mga designated parking area daplin sa karsada. Kaniadtong tag P15 lang ang parking fee sa mga sakyanan matag oras apan karon gihimo na nga P20 human nga giaprobahan sa konseho ang maong usbaw.
Basi sa talaan nga gisumiter ni Yap didto sa Konseho sa Dakbayan nagpakita nga ang koleksyon sa CITOM gikan sa administrative fine misaka gikan sa P425,255 sa Enero kaniadtong miaging tuiga ngadto sa P2,539,255 nga daw gipilo og kalima.
Ang koleksyon sa pay parking fees misaka lang gikan sa P3.2 millyones ngadto sa P3.9 milyones.
Usa sa nakaingon nga misaka ang koleksyon sa administrative fines kon multa sa mga nadakpang drayber mao ang pagpatuman sa bag-ong pamaagi sa CITOM.
Kaniadto pasagdan lang ang mga drayber nga naisyohan og mga Traffic Citation Tickets nga dili mobayad apan karon padad-an na gayud sila og mga subpoena nga kun dili nila bayran ang ilang multa pasakaan sila’g kaso.
Mga sakop sa CITOM mihulagway sa maong paagi nga hilabihan kahasol kanila kay sila usab maoy mo-serve sa subpoena sa ilang mga nadakpan, ilabi na kun mga PUJ drivers.
(BANAT NEWS)