DSWD padayong nanglista sa nabiktima sa bagyong Pablo

CEBU, Philippines - Ang Department of Social Welfare and Development Field Office 7 (DSWD-7) pinaagi sa National Household Targeting Unit (NHTU) miawhag sa Local Government Units (LGUs) sa Central Visayas sa pagsumiter og ngalan sa mga giilang pamilya nga naapektohan sa miaging bagyo nga "Pablo" alang sa espesyal nga balidasyon.

Sa nasayran ang bagyong Pablo nakabiktima  og daghang  pamilya gikan sa Mindanao paingon sa Kabisay-an ug  midaot  usab  sa  mga  tanom  ug  mga  kabtangan  sa  mga  molupyo  sa nahisgutang  mga  rehiyon busa  nagkinahanglan  og  tabang  ang  mga biktima.

Sumala pa ni Kerwin Macopia, Administrative Assistant V ug tigpamaba sa programang National Household Targeting System for Poverty Reduction (NHTS-PR) sa DSWD 7 nga ang Central Visayas nakatala og 18, 811 ka mga  pamilyang biktima sa maong bagyo  subay sa Protective Services Bureau sa DSWD hinungdan  nga  paspasan  sa maong  ahensya  ang  balidasyon o  pagpanglista niini karong umaabot nga Marso ning tuiga aron masuta ang kasamtangang kahimtang sa NHTS-PR.

Dugang pa ni Macopia nga ang mga bag-ong gipahigayonan og ebalwasyon nga mga kabalayan moagi una  sa  gitawag nga Proxy Means Test alang sa pag-ila sa mga kabus ug dili mga kabus nga kabalayan nga maoy gigamit sa DSWD ubos sa NHTS-PR nga programa.

Pinaagi  niining  maong Test mabana-bana  ang kinitaan   sa matag pamilya  base sa proxy variables nga nahilakip sa household assessment form.

Sa bahin usab ni DSWD-7 Regional Director Mercedita Jabagat, siya miingon  nga aron madali  ang proseso sa pag-ila sa mga kabus, ang mga Local Government Units (LGUs) pinaagi sa Social Welfare sa ilang syudad ug munisipalidad ug usab development officers mosumiter lamang sa mga ngalan sa mga apektadong pamilya.

Gibutyag ni Jabagat nga ang balidong resulta magsilbing input o  basehanan sa pag-umol sa sosyal nga proteksyon ug intervention nga mga programa nga gigahin sa mga apektadong kabalayan.

Sa susamang kalamboan, ang DSWD gipaabot nga mokuha  og   108 ka field staff atol sa usa  ka  buwan  nga  pagpanglista  nga  maglakip  sa  78 ka enumerator, 13 area supervisor, 2 ka area coordinator ug 15 ka encoder. (BANAT NEWS)