CEBU, Philippines - Namatay ang usa ka lalaki human kini atakeha sa altapresyon samtang naligo sa dagat sa Cabahug Shipyard sa Barangay Opao sa dakbayan sa Mandaue sa miaging buntag.
Si SPO2 Juan Calamba sa kapolisan sa Presinto 5 sa Mandaue City Police Office (MCP0) miila sa namatay nga mao si Felix Cimafranca, 64 , minyo nga nagpuyo sa maong dapit.
Matud pa ni SPO2 Calamba nga naglangoy-langoy pa ang biktima sa mabaw nga bahin sa dagat sa Cabahug Shipyard dihang namatikdan sa mga kauban ang kalit lang niining pagkaunlod.
Dali nga gitabang ang biktima sa mga kauban nga mga sakop sa pamilya kinsa kauban niyang naligo sa maong higayon ug gikarga kini sa ambulansiya sa Emergency Rescue Unit Foundation (ERUF) ug gihatud ngadto sa Mandaue City Hospital sa maong dakbayan.
Dugang pa niya nga ang mga doktor sa maong tambalanan nga nagtinabangay sa pagtabang sa biktima mideklarar niini nga dead on arrival.
Si SPO2 Calamba miingon nga ang mga sakop sa Philippine Coast Guard nga nakadawat sa maong taho dali nga mihimo og pakisusi ug ilang giklaro nga base sa resulta sa medical examination sa mga doktor ilang nasuta ang pag-atake sa sakit nga high blood maoy nakaingon sa kamatayon niini. (BANAT NEWS)