CEBU, Philippines - Patay nang natagak sa motorsiklo nga iyang gisakyan ang 60-anyos nga negosyante og utanon nga itumod sa Carbon Public Market human kini gipusil samtang nag-angkas sa motorsiklo nga iyang gisakyan didto sa bukirang bahin sa barangay base sa lungsod sa Sibonga alas- 6 pasado sa hapon niadtong Huwebes.
Ang biktima mao si Rosalio Mestrallas, 60, molupyo sa barangay Manatad, Sibonga ug ang suspek gihulagway lang nga duha ka tawo sakay og motorsiklo ug nag-angkasay.
Matud ni SPO1 Jaime Mendoza sa Sibonga Police Station dihang nahinabi sa Banat News ang biktima nag-angkas sakay sa motor tulo sila tanan apan siya maoy nahimutang sa kinaluyohan nga bahin.
Ang mamumuno nagsunod nang daan og pag-abot sa maong lugar ang angkas kalit nga nibunot sa iyang armas dayun gipusil makadaghang higayon ang biktima sa duol lang kaayo nga distansiya.
Matud pa ang biktima maayong pagkaigo sa sentro sa bukobuko nga bahin ug sa tuong bahin sa nawong ug ni-resulta sa pagkatagak sa biktima ug nalamba usab ang motorsiklo nga ilang gisakyan.
Ang mga suspek dihang nakita nga naigo ang biktima nipasutoy dayon paingon sa barangay Mompeller sa lungsod sa Argao.
Dugang nahipos nga impormasyon sa kapulisan, ang anak sa biktima gikatahong nalambigit kini sa kaso sa pag-pamusil didto sa lungsod sa Argao pipila ka tuig ang nilabay.
Ang kapulisan padayon pa sa ilang imbestigasyon pagtumbok sa mga suspek ug motibo ug gikonsiderar nila ang tanang anggulo apil na ang iyang pangita nga pagka-negosyante og utanon. (BANAT NEWS)