Police checkpoint gidasmagan sa hubog nga Koreano

CEBU, Philippines - Usa ka Koreano ang gisikop sa kapolisan atol sa usa ka checkpoint diha sa may dan U.N. Avenue sa Brgy.Alang-alang dakbayan sa Mandaue human niini gibanggaan ang checkpoint signage ug gi-binaboy og kasaba ang kapolisan nga mipahigayon og checkpoint. Si Do Hyung Park, 44, residente sa  Brgy. Basak sa Lapu-lapu City gidakop sa grupo ni Sr.Insp. Alexander Nuñez. Matud pa nga sakay sa usa ka Honda Civic nga awto nga may plakang 7CZ-846 ang suspek. Giingong kusog kaayo ang dagan niini maong nadasmagan niini ang signages.

Apan inay nga mangayo og pasaylo, nasuko pa kini kang Nuñez ug gikasab-an ug gi-kwestyon nganong dunay checkpoint sa maong dapit.

Tungod sa taras sa maong langyaw gidakop kini ug gipailawom sa liquor test sa Mandaue City Hospital diin migawas nga positibo kini nga nakainom. Kasong malicious mischief, unjust vexation ug posibleng ma-revoke pa ang lisensya sa suspek tungod sa pagmaneho nga nakainom ang maong langyaw.  (BANAT NEWS)