CEBU, Philippines - Wala matagbaw ang Team Rama sa hukom sa Commission on Elections-First Division nga nag-disqualify ni Konsehal Augustus Pe Jr. sa iyang tinguha nga molansar pagka konsehal sa south district sa dakbayan sa Sugbo karong umaabot nga eleksyon.
Matud ni Mayor Michael Rama nga bisan og paborable kanila ang hukom sa Comelec-First Division apan moduso sila og Motion for Reconsideration didto sa Comelec En-Banc aron awhagon ang mga commissioners nga usbon ang hukom sa kaso ni Pe. Gitataw ni Rama nga gusto nilang hukman g’yud sa Comelec nga ang pagdagan ni Pe isip konsehal didto na sa south district kalapasan gyud sa balaud kay magsilbi na man kini nga ika-upat niya ka termino.
Ang balaud naglatid nga tulo lang ka termino, bali’g tulo ka tuig sa matag termino, ang itugot sa mga elective public officials, walay labot sa presidente nga unom lang ka tuig nga termino.
Ang Comelec-First Division mihukom nga ang “term limit†dili magamit alang ni Pe kay ang iyang gidaganan lahi na nga distrito ug ang mopili kaniya lahi na usab nga mga botante.
Si Pe gi-disqualify sa Comelec-First Division sa iyang pagdagan pagka- konsehal tungod lang sa rason nga wala kaayo siya’y klaro kun nagtinguha ba gyud siya nga mobalhin sa south district gikan sa north district.
Matud sa Comelec nga samtang tua na nagparehistro si Pe sa south district, apan nagpabilin siya nga konsehal sa dakbayan nga nagrepresentar sa north district.
Si Rama miingon nga ipasabot nila pag-ayo ngadto sa Comelec nga dili tukma ang ilang hukom. Si Pe dunay katungod sa pagpasaka og Motion for Reconsideration sulod sa lima ka adlaw gikan sa pagkadawat niya sa opisyal nga kopya sa iyang kaso gikan sa Comelec.
Kun dili makontento si Pe sa hukom unya sa Comelec En-Banck makahimo gihapon siya pagpasaka og Petition for Review didto sa Supreme Court.
Alang ni Rama ang mahinungdanon nga nasayran na sa katawhan nga gidiskwalipikar na si Pe sa iyang kandidatura, apan ang konsehal miingon nga mopadayon gihapon siya sa iyang pagpangampanya. (BANAT NEWS)