CEBU, Philippines - Mokabat 246 ka paresan ang gikasal sa duha ka mayor sa dakbayan sa Lapulapu ug Mandaue atol sa adlaw sa kasingkasing kagahapon sa buntag. Nagmalampuson ang kasal nga gipahigayon ni Lapulapu City Mayor Paz Radaza sa Lapulapu City Auditorium diin 116 ka paresan ang mipaubos sa maong “Civil Wedding†sa unang higayon nga si Mayor Radaza ang mi-administer sa maong kasal.
Matud pa ni Radaza napakyas ang 16 ka paresan sa pagkuha sa ilang mga dukomento “Certificate of No Marriage†hinungdan nga 116 lamang ka paresan sa 130 ka mga nagpalista sa milabay’ng bulan sa Enero tuig 2013. Ang mga nagpakasal mga sakop sa 4P’s kon Pantawid nga Pamilyang Pilipino Program diin ang pinakataas og edad sa nagpakasal mao si Eduardo Saladaga, 61 ug Tina Bongasiso, 38 nga adunay lima ka anak ug nagpuyo na sud sa 17 ka tuig sa Seaside Brgy. Pajo dakbayan sa Lapulapu.
Ang kinabataan usab sa mga gikasal mao si John Cabardo, 21, ug Marie Barbosa, 19, nga residente sa Brgy. Talima Isla sa Olango. Samtang si Cabardo mipadayag sa iyang kalipay nga tumong sa adlaw sa kasingkasing ang ilang kasal gumikan sa matag saulog niini ilang mahinumduman ang adlaw nga sila gihiusa isip magtiayon. Si Cong. Arturo “Boy†Radaza, mga konsehales sa dakbayan sa Lapulapu ug mga kapitan sa 30 ka barangay ang miluhod sa mga gikasal diin human sa kasal gisunod dayon ang salo-salo nga gigastuhan sa mga tagdumala sa 4Ps ug sa kaugalingong bulsa sa mayor.
Samtang sa dakbayan sa Mandaue si Mayor Jonas Cortes maoy nangunay usab sa pagkasal sa 130 ka paresan nga dugay nang nag-ipon ug nahatagan na og katumanan. Kagahapon sa buntag sa J. Centre Mall gipahigayon ang maong kasal uban sa mga sakop ug kawani sa Pag-Ibig Fund dungan sa pagsaulog sa Valentine’s Day.
Gumikan niini mapasalamaton si Mayor Cortes nga sa dakbayan sa Mandaue gipahigayon ug siya mismo ang mikasal sa maong paresan nga gikan sa nagkadaiyang dapit dinhi sa probinsiya sa Sugbu ug dili lamang gikan sa Mandaue. (BANAT NEWS)