Grupo sa Alayon miduaw sa Lagtang

CEBU, Philippines - Grupo sa Alayon o administrasyon sa dakbayan sa Talisay nakighimamat kagahapon sa buntag sa taga barangay Lagtang.

Uban nila ni incumbent Vice Mayor Alan Bucao ang apo ni Kongresista Eduardo Gullas nga si Samsam Gullas kinsa midagang kongresista sa unang distrito sa probinsiya sa Sugbo ug Pablo John Garcia ug kaalyado niining si Boboy Durano sa One Cebu Party.

Si Samsam nga nahinabi sa mga tigbalita kagahapon nagkanayon kini nga mosuroy pa sila ngadto sa ubang mga barangay sa Talisay aron magpaila ug makighimamat.

Kahinumduman nga si Acting Vice Governor Agnes Magpale maoy gideklara sa pamilyang Gullas nga suportahan tungod sa kasuod sa ilang pamilya.

Apan dili malikayan nga si Durano magkuyog gyud kini ug si PJ tungod kay sila man maoy pares nga midagan isip gobernador ug bise gobernador sa probinsiya.

Matud ni Samsam nga ang tanan dunay kagawasan kung kinsay ilang pilion tungod kay ubos kita sa demokrasya.

Si PJ sa iyang bahin, nagkanayon kini nga nagpasalamat siya nga bisan og dili ang iyang pares isip pagka-bise gobernador ang gi-endorso sa Alayon apan gihatagan kini og higayon nga makahimamat sa mga katawhan sa unang distrito.

Matud ni PJ nga girespeto nila ang commitment sa Alayon ug dili sila mangita og paagi nga maguba kini.

Si Durano sa iyang bahin, nagkanayon kini nga nalipay siya nga nahatagan siya og kahigayonan nga nakakuyog sa grupo sa pakighimamat sa mga tawo sa kabarangayan sa distrito.

Si Durano nangangkon kini nga ang ilang pamilya ug ang pamiyang Gullas nga suod usab nga higala. (BANAT NEWS)