Campaign Manager Gipatay

CEBU, Philippines - Duha ka giingong political leaders sa mga lokal nga mga kandidato sa Sugbo ang gipamusil, usa kanila ang patay.

Patay nang nadangat sa tambalanan ang uyo-an ug campaign manager ni Liloan mayor Duke Frasco nga si Marlito “Titi” Cañete, 51, human kini gipusil sa gawas sa tindahan sa Poblacion, Liloan kagahapon sa buntag.

Si Cañete nagbasa og pamantalaan dihang giduol sa duha ka wala mailhing lalaki nga luwan og Kawasaki Fury nga motorsiklo ug mipusil kaniya makadaghang higayon.

Ang gitumbok nga mipusil sa biktima giingong nagsuot og itom nga sweatshirt ug semi opaw ang buhok nga gibanabanang 5’4 ang gitas-on ug tambukon ang lawas.

Matud ni PO3 Jason Gayo sa Liloan Police Station dihang nahinabi sa Banat News ang gunman mao ang angkas sa maong motorsiklo ug human maigo ang biktima dali silang miikyas.

Patay na pag-abot sa Perpetual Soccour Hospital si Cañete. Usa ka slug sa wala pa matinong kalibre sa bala ang nakuha diha sa crime scene samtang dili pa mokompirmar ang kapolisan kung politika ba ang motibo sa krimen.

Si Sr. Supt. Patrocinio Comendador, ang director sa Cebu Provincial Police Office mimando sa Provincial Investigation Bureau sa pagtabang sa imbestigasyon.

Karong adlawa pa gikatakdang mohatag og pamahayag si Mayor Frasco kabahin sa nahitabo sa iyang uyoan.

Sa laing pagpamusil, gikompirma ni Engr. Gigi Sanchez nga political leader sa Liberal Party sa lungsod sa Pinamungahan ang naangol nga si Ben Arnas nga miresulta sa pagkaangol usab  sa 16-anyos nga anak niini.

Ang pagpamusil nahitabo sa barangay Magseko sa lungsod sa San Fernando niadtong miaging alas-4 sa kaadlawon samtang paingon unta kini sa trabaho.

Matud pa ni Sanchez sa interbyu sa dyDD ilahang political leader sa barangay Anislag sa Pinamungahan si Arnas. (BANAT NEWS)